स्वप्नं १ ( #dream 1 )

 स्वप्नं सांगायला प्रत्यक्ष सुरूवात...

           आता स्वप्नंच सांगायची तर

  अगदी लहानपणापासून सुरूवात करावी लागेल. पण आता लगेचच काही आठवत नाहीय. आपण एक करूया. तूर्त साधारणपणे वर्ष दीड वर्षांपूर्वीपासूनच्या स्वप्नांनी सुरुवात करूया. काही स्वप्नेच मी माझ्या इतर ब्लाॅगमधील काही लेखांत वेगळ्या संदर्भात नमूद केलेली आहेत, तर काही मला आठवतील तशी मी ती सांगणार आहे.  

आज मी सांगणार आहे 

    ..... ते माझ्या ओन्ली देवीदास या ब्लॉगवर कथन केलेले व दि. ०२.०४.२०२० रोजी पडलेले स्वप्नं.

 ते स्वप्नं असं आहे बघा...

         आमचा मुलगा कुठे तरी दुस-या मजल्यावरच्या खोलीच्या मध्यभागी फूलपँट आणि इनशर्ट घालून रात्रीचा डाराडूर झोपलेला असतो. त्याच्या पायाखालील भिंतीकडे एकाखाली एक असे सावंतवाडीतले मोहन सावंत व अनंत दळवी हे झोपलेले असतात. नऊ वाजता मी त्या खोलीत झोपायला जातो तर मोहन सावंत न बोलता गडबडीने उठून मुलाच्या बाजूला जाऊन झोपतात. मी त्यांनी रिकाम्या केलेल्या जागेवर झोपतो. आम्ही काहीच बोलत नाही. असे ते स्वप्नं होते.

   काय असेल त्या स्वप्नाचा अर्थ ?

      वरवर पाहता, यात काहीही विशेष असे दिसत नसले तरी स्वप्नातून जागा होतांना मी किती गोंधळलो होतो.‌ तेव्हा आणि त्यानंतरही माझ्या मनात दोन प्रश्न येत होते. स्वप्नात, मी तिथे जाताच मोहन सावंत माझ्या मुलाच्या बाजुला का जाऊन झोपले आणि दुसरी जागा असतांनाही मी त्यांच्याच रिकाम्या झालेल्या जागेवर का जाऊन झोपलो ? 

         कुणाला उत्तर देता येईल का ? 

           सांगा पाहू !